暑假北上又多一個好去處！「蠟筆小新·夏日運動會」已經登陸深圳南山區的 K11 ECOAST，由即日起至 8 月 31 日免費開放。今次小新帶埋春日部防衛隊一齊嚟到深圳，仲有機會見到「曬黑版小新」嘅超萌限定造型，粉絲們絕對不能錯過！

會場設有多個運動主題打卡點，包括排球、網球同賽跑等場景，全部還原小新獨有的搞笑風格。現場設有期間限定店，發售多款限定「黑皮」周邊商品，鍾意儲小新精品嘅朋友記住預留時間慢慢揀。場內仲設有「野原一家」影相位，可以同小新、爸爸廣志、媽媽美冴同妹妹小葵一齊影張全家福留念。

提提大家，K11 ECOAST 位於南山區太子灣，商場分為南北兩館，佔地極廣，建議預留至少半日時間慢慢行。可以乘搭深圳地鐵 12 號線至「太子灣」站直達。今個暑假約埋朋友家人一齊上去，同小新瘋狂打卡放電啦！