Pokémon 30周年香港活動攻略

Pokémon 卡牌迎來30周年，擴充包「超級進化 30th CELEBRATION」9月16日（三）香港同全球同步開賣！每包建議零售價 HK$25，一包6張保底全閃卡，仲必中1張（共30款）Pikachu 特別卡同基本能量卡。今次首度加入全新稀有度「FUR」，夢幻 ex、超夢 ex 勢成焦點。本地卡舖已經開緊 pre-order，預計發售日實排長龍。想入坑或儲齊30款 Pikachu 嘅訓練家，記得盡早問舖頭留貨，手快有手慢無！

(圖片來源: 寶可夢官方網站)

香港訓練家終於唔使得個恨字！官方確認全港首間 Pokémon Center 期間限定店將於 2026年11月 登陸九龍塘又一城，同場搞埋30周年慶祝活動。預計會有海量官方原裝商品、限定周邊，加埋大型打卡位，銀包準備大出血。確實開幕日同購物特典等緊官方公佈。

慶祝30周年，官方路跑 Pokémon RUN 30 亞洲巡迴壓軸一站落戶香港！2027年1月23至24日喺科學園開跑。約2公里賽程輕輕鬆鬆，最啱一家大細同休閒跑手。場內仲有免費嘉年華，有限定 Pop-up、Pikachu 見面會同卡牌試玩；《Pokémon GO》玩家亦有現場限定加碼。報名已經開始，額滿即止！開報首4日成功報名仲送 Pikachu 肩膀公仔，想跑定純粹入去嘉年華打卡，都要𥄫實名額啦。