農夫（FAMA）一連三場《農夫全香港最好笑嘅演唱會》於紅館圓滿結束後，由於笑聲不絕、觀眾反應熱烈，網上仍一片「買唔到飛」、「加開Part 2」的呼聲。對於加場要求，農夫當然聽到，然而紅館檔期與他們的騷一樣——「難求」。眼見大家想加場、想入場再玩謝農夫，二人決定：不如玩到過大海啦，最快拿到場地！

今日農夫正式宣布兌現承諾，移師澳門威尼斯人綜藝館舉行澳門站演出。上次紅館兩人在台上笑言：「今次咁抵睇，下次我哋加價啦。」果然過澳門開，兩人即時宣布：「我哋大幅加價！——每張票加足8蚊！」

上次紅館每晚也有特別嘉賓，今次澳門當然少不了。農夫笑言：「今次澳門勁，我哋決定飛起大師麥玲玲！佢貴人事忙，做完我地上次三場騷，已經話搞唔掂，好多job要補番冇時間——巴閉啦！所以今次，我哋決定搵個靚過麥玲玲、瘦過麥玲玲嘅大師嚟做嘉賓。邊個？到時過大海一齊玩你咪知囉！」

至於會否展開世界及內地巡演，農夫表示：「要先完成同張繼聰籌備嘅全新大型綜藝舞台Show《人夫集團》先，再搵檔期去週遊列國。」兩人亦不忘向老闆古天樂交代：「我哋同古生開咗間『農作天下（So Fa So Cool）』，如果兩隻嘢得個講字冇貨交，點對得住古生？」

《農夫全香港最好笑嘅演唱會》澳門站詳情：

• 日期：2026年7月18日（星期六）

• 時間：晚上8時

• 地點：澳門威尼斯人綜藝館

• 票價：澳門幣/港幣 788元 / 588元 / 388元

售票資訊：

• 優先發售：2026年6月3日（星期三）中午12時，Klook獨家套票優先發售

• 公開發售：2026年6月5日（星期五）中午12時，金光票務公開發售